BRADLEY COOPER

Cooper fæddist í Philadelphiu árið 1975 og var fyrirmyndarnemandi (ólíkt flestum persónum sem hann leikur), þar sem hann útskrifaðist með láði í ensku frá Georgetown-háskóla. Eftir það tók leiklistin við þar sem hann fékk mastersgráðu frá hinum virta Actors Studio-leikaraskóla í New York. Fyrsta kvikmyndahlutverkið hans var árið 2001 í Wet Hot American Summer. Hann fékk sitt fyrsta Broadway-sviðshlutverk árið 2006 í verkinu „Three Days of Rain“, á móti Juliu Roberts og Paul Rudd, og hefur leikið í nokkrum Broadway-verkum síðan þá. Hins vegar hefur kvikmyndaferillinn, sem er á hraðri uppleið, með myndum eins og The A-Team og Limitless, tekið algerlega við í bili.

ED HELMS

Helms fæddist í Atlanta árið 1974, fór í háskóla í Ohio, en grínhæfileikar hans komu snemma í ljós og færðu honum ýmis gamanhlutverk í þáttum eins og Arrested Development og Premium Blend, áður en hann fékk fast hlutverk sem Andy Bernard, sölumaðurinn skapbráði í þáttunum The Office. Í dag er hann fastur gestur í gamanmyndum á borð við The Goods: Live Hard, Sell Hard, Harold & Kumar Escape from Guantanamo Bay, Meet

Dave, Semi-Pro, Walk Hard og Evan Almighty, auk Hangover-myndanna, að sjálfsögðu. Svo er hann víst líka feiknagóður banjóleikari.

ZACH GALIFIANAKIS

Galifianakis fæddist í Norður-Karólínu árið 1969 og flutti til New York eftir að hafa fallið í síðasta áfanganum sínum í North Carolina-háskólanum. Hann hóf uppistandsferil sinn á hamborgarabúllu á Times Square, færði sig smám saman yfir í grínklúbba og kaffihús í borginni og vann sem töskuberi á hóteli á meðan. Hans fyrsta hlutverk fyrir framan myndavél var í þáttunum Boston Common. Eftir mörg smáhlutverk sló hann svo í gegn í fyrri Hangover-myndinni og fær nú mun fleiri tilboð um hlutverk en hann kemst yfir. Hann heldur þó í ræturnar með gríni eins og netspjallþáttunum „Between Two Ferns“. Flettið þeim upp ef þið vitið ekki hvað þeir eru.

JUSTIN BARTHA

Bartha, sem fæddist í Michigan-fylki árið 1978, hefur líklega eina breiðustu reynsluna af öllum félögunum, því eftir að hafa útskrifast frá kvikmyndadeild hins virta Tisch-leiklistarskóla hefur hann tekið að sér gaman- og dramahlutverk jöfnum höndum. Hann vakti fyrst almennilega athygli sem

Riley Poole í National Treasure-myndunum, en hefur auk þess leikið í gamanmyndunum Trust the Man, Failure to Launch og The Rebound, auk indímyndarinnar Shoe at Your Foot og Holy Rollers. Árið 2010 bætti hann svo Broadway á ferilskrána með hlutverki í gamanleikritinu Lend Me A Tenor, sem sjálfur Stanley Tucci leikstýrði.

KEN JEONG

Jeong á töluvert öðruvísi fortíð en félagarnir fjórir. Ken, sem fæddist árið 1969 í Greensboro í Norður-Karólínu, menntaði sig sem læknir í Duke og Norður-Karólínu-háskólunum. Hann vann sem læknir í New Orleans á meðan hann fetaði sig áfram í gríninu. Hann vann uppistandskeppni í New Orleans árið 1995, og breytti það ferli hans til frambúðar. Dómarar keppninnar hvöttu hann til að flytja til Los Angeles, þar sem hann sló í gegn sem uppistandari og fékk loks hlutverk í þáttum eins og MADtv, Entourage og The Office. Fyrsta kvikmyndahlutverk hans var svo sem læknir, í myndinni Knocked Up árið 2007. Seinna í sumar munum við svo sjá hann í enn fleiri myndum, t.d. í Transformers: Dark of the Moon og The Zookeeper, og það er spurning hvort hann stelur ekki senunni þar eins og svo oft áður.

9 myndir mánaðarins 9 myndir mánaðarins