DRAUMAFRÍIÐ

Nú þegar landinn æðir upp í fugvélar í stórum stíl og stefnir á strendur og stórborgir látum við hjá Myndum mánaðarins okkur dreyma um hið fullkomna frí. Hér eru þeir áfangastaðir sem heilla mest.

Rofadalur

(Lord of the Rings)

Hvað er frábært: Rofadalur (e. Rivendell) er gullfallegur áfangastaður sem minnir á heilsuspa í Hveragerði, nema bara aðeins stærra. Láttu álfana tjasla þér saman eftir slæma stungu í brjóstkassann eða skyndilega hrörnun eftir missi uppáhalds hringsins þíns. Það er aldrei að vita nema ein eyrnamjó gef þér glingur og hjarta sitt í leiðinni.

Hverju þarf að passa sig á: Skapsveifum Elronds og öðrum gestum á spa-inu. Passaðu þig sérstaklega á hobbitunum, þeir stúta svefnfriðnum á augabragði með því að hoppa óvænt upp í rúm gesta og kæfa þá í væmni.

Pandóra (Avatar)

Hvað er frábært: Pandóra er staðurinn fyrir ævintýragjarna. Jörðin glóir þegar þú stígur á hana í tunglskininu, furðuverur ganga lausar og fjúga um loftin blá. Allstaðar má sjá ómengaða náttúru, fóru sem á sér enga líka og stærstu tré sem nokkru sinni hafa sést. Já og léttklæddar bláar ofurverur á sprangi ef maður er heppinn, þ.e.a.s. ekki dauður.

Hverju þarf að passa sig á: Ef þú ert með frjókornaofnæmi, haltu þig frá stóra hvíta trénu. Ekki gleyma súrefniskútnum, haglabyssunni og þyrlufugmanninum heima, þú munt þurfa á þeim að halda. Ef þú rekst á kapitalísk svín á skriðdrekum er líklega kominn tími til að fara. Ekki klappa hundunum og varastu að vingast við þessar bláu, ef þú sefur hjá þeim einu sinni þarftu að giftast þeim og færð aldrei að fara heim aftur. Eilífð af því að hlusta á tré í gegnum skott bíður þín. Var þá ekki auðveldara að fara til Benidorm?

Skemmtiferðaskipið Svarta Perlan (Pirates of the Caribbean)

Hvað er frábært: Svarta Perlan á sér engan líka, en hún er hraðskreiðasta skemmti-ferðaskipið í bransanum. Láttu áhöfnina stjana við þig með gömlum kjól og skuggalegum kræsingum. Gakktu plankann í tunglskininu, leiktu þér við apann Jack, taktu þátt í uppreisn gegn skipstjóranum (haldið aðra hverja viku), upplifðu háskalega eltingaleiki og sprengjuárásir frá öðrum skipum, farðu í Kraken-skoðun og stútaðu þínum skerf af rommi. Upplagt er að syngja með þegar áhöfnin tekur lagið, hvort sem hún er lífs eða liðin það skiptið.

Hverju þarf að passa sig á: Ekki taka þátt í ratleiknum, það mun aðeins koma þér í klandur og hugsanlega leggja á þig bölvun um ókomna tíð. Ekki gera ráð fyrir því að þú getir snúið aftur frá dauðum og láttu þessa undarlegu konu með dreddana og hreiminn alveg eiga sig. Þú ferð í land á eigin ábyrgð og engar sjóveikipillur eru um borð. Mundu loks að öll bræðralög eru álíka trygg og þau í Survivor og láttu vera að freistast í ferðina í kistu Davy Jones. Ég sagði ekki... Ojæja.

Narnía

(The Chronicles of Narnia)

Hvað er frábært: Þeir fáu sem gerast svo heppnir að komast til Narniu eiga von á ótrúlegri ævintýraferð, hvort sem skíðaferð í vetrarríki hvítu nornarinnar eða sigling í kringum eyjur landsins á skipinu Dagfara verður fyrir valinu. Upplifðu land fullt af talandi dýrum, dýfðu dótinu þínu í lindina sem gerir allt að gulli, smakkaðu heimsins besta turkish delight í skoðunarferð þinni um ísstyttugarð nornarinnar eða gíraðu þig upp í blóðugan bardaga og sallaðu niður óvininn. Narnía býður upp á eitthvað fyrir alla fjölskylduna! Eigir þú ekki skemmtilegan skáp fullan af pelsum eða míglekandi málverk getur hins vegar verið erftt að komast á leiðarenda.

Hverju þarf að passa sig á: Vera má að þú sjáir risastórt talandi ljón en enginn trúi þér. Ekki hafa áhyggjur, það mun bíta þá í rassinn síðar meir. Ef svo illa vill til að þú sért í það minnsta sjálfselskur, hégómafullur, drambsamur eða hrokafullur þá máttu búast við að þú upplifir hryllilegar martraðir, þér sé breytt í dreka eða þér sé hegnt á nokkurn þann hátt sem hugsast getur. Komist upp um að þú sért bölvaður guðleysingi er úti um þig.

Hogwarts (Harry Potter)

Hvað er frábært: Hogwarts er með fottari hótelum á jarðkringlunni en þar má taka alls kyns námskeið, stinga sér til sunds með pínulítið skrítnu fólki sem býr í vatninu, sjá heimsklassaleiki í quidditch og týna sér í mögnuðu skóglendi. Á hótelinu sjálfu er boðið upp á alls kyns kræsingar, skreytingarnar virðast hanga í lausu lofti og öryggisverðirnir eru, tja, reyndar pínu gegnsæir og einhver hélt því fram að kannski væru þeir dauðir. Gerðu þér ferð í dýragarð Hagrids, grasagarð frú Sprout og fáðu þér í aðra tánna í boði Prófessor Slughorns. Stutt er í bæjarferðir til Hogsmead, iðandi verslunarsvæðis af fínustu sort.

Hverju þarf að passa sig á: Varastu að halla þér yfir skálar fullar af vökva, láttu allar bækur sem þú finnur eiga sig, haltu þig fjarri Prófessor Snape og láttu vera að keppa í leiknum sem verið er að auglýsa, vinningurinn er ekki þess virði. Ef þig fer að dreyma illa, ekki segja neinum frá því og ekki pota í húðflúr annarra með priki. Ekki freistast til að vingast við hestafólkið svokallaða, það er ekki eins og þau í Garðabænum, þótt lyktin sé kannski svipuð. Varastu allt sælgæti, ekki drekka neitt sem aðgangsharðir aðdáendur bjóða þér og ef þú rambar inn í herbergi sem var ekki þarna, ekki hafa áhyggjur. Áður en þú veist af mun sæt unglingsstelpa kyssa þig.

24 myndir mánaðarins