Kynsvallið að hefjast – nýtt auglýsingaplakat

Lars von Trier og aðrir aðstandendur myndar hans Nymphomaniac ( sjúklega vergjörn kona ) hafa birt á Facebook síðu myndarinnar og á heimasíðu hennar, auglýsingamynd fyrir myndina, og má sjá hana hér fyrir neðan. Smelltu á myndina til að sjá hana í fullri stærð:

nymphomaniac

 

Eins og sjá má á myndinni þá er leikstjórinn umdeildi Lars von Trier með teipað fyrir munninn í efra vinstra horninu, Willem Dafoe er í miðið, Stellan Skarsgård situr í baðsloppi til hægri og Charlotte Gainsbourg, aðalleikkonan, situr lengst til hægri og fyrir framan hana er Christian Slater, svo einhverjir séu nefndir, en fólk er þarna á tvist og bast í létt-kynferðislegum stellingum.

Aðrir leikarar eru m.a. Stacy Martin, Shia LaBeouf, Jamie Bell, Connie Nielsen og Jesper Christensen.

Myndin verður frumsýnd í Danmörku 30. maí nk. Upphaflega átti að frumsýna myndina á Cannes kvikmyndahátíðinni en af því verður ekki samkvæmt frétt í breska blaðinu The Guardian. 

Deadline vefsíðan hefur lýst myndinni sem fjögurra klukkustunda löngu kynsvalli.

Myndin segir söguna af því þegar á köldu vetrarkvöldi kemur gamall og heillandi piparsveinn, Seligman, sem leikinn er af Stellan Skarsgård, að Joe, sem leikin er af Charlotte Gainsbourg, þar sem hún liggur slösuð í húsasundi eftir að hafa verið barin til óbóta. Hann fer með hana heim í íbúð sína þar sem hann hjúkrar henni á meðan hann spyr hana út í líf hennar. Hann hlustar með athygli á það þegar hún fer yfir 8 mismunandi kafla í lífi sínu, sem er margskipt og þar sem margt fólk kemur við sögu, en hún lýsir sjálfri sér sem sjúklega vergjarnri.