Diesel trjáskrímsli í GOTG?

vin diesel í fast fiveBandaríski leikarinn Vin Diesel á nú í viðræðum um að leika í nýjustu Marvel myndinni, Guardians of the Galaxy samkvæmt óstaðfestum fregnum. Diesel setti mynd af Groot ( sjá meðfylgjandi mynd ) inn á Facebook síðu sína í gær án þess að segja neitt meira. Myndin var á síðunni um tíma, en hvarf svo síðar.

Ekkert var minnst á þátttöku Diesel á kynningu sem Marvel hélt nú á laugardaginn á myndinni, en staðfestir leikarar í myndinni eru Chris Pratt, Benicio del Toro, Zoe Saldana og Glenn Close m.a.  James Gunn leikstýrir.

grootGroot er geimveruskrímsli af plöntuætt og innbyrðir tré til að öðlast meiri styrk og læknast af sárum sínum, ásamt því að stjórna trjám. Þessi geimvera er ofurgáfuð og virðist einungis segja „I am Groot“ í sífellu, þannig að Disel þarf ekki að leggja mikinn texta á minnið ef hann landar þessu hlutverki.

Í Marvel teiknimyndasögunum hefur þetta skrímsli barist við Hulk og Thanos m.a.

Þessi Facebook færsla Diesel er ekki í fyrsta skiptið sem leikarinn gefur til kynna að hann komi til með að leika í Marvel mynd en 45 milljón vinir hans á Facebook fengu skilaboð um það frá honum í júlí að hann væri á leið á fund hjá Marvel, en hefur ekkert sagt að ráði meira, nema að von væri á fleiri fréttum.

Ef Diesel er í raun á leið í Marvel heiminn, yrði það ekki í fyrsta skiptið sem hann kemur nálægt teiknimyndafígúrum, en Diesel talaði fyrir The Iron Giant, í leikstjórn Brad Bird árið 1999.

 

Nú er bara að bíða eftir staðfestum fregnum af þátttöku leikarans í Guardians of the Galaxy, en myndin verður frumsýnd næsta sumar.