Sitt sýnist alltaf hverjum um Áramótaskaupið um ár hvert og þykir mikið sport að deila um gæði þess. Má þó segja að viðbrögð séu almennt í jákvæðari kantinum þetta árið, af fyrstu tístum landsmanna að dæma.
Í Skaupinu var farið yfir góðkunnug mál með óvæntum uppákomum á meðan gert var upp það undarlega ár sem 2020 var. Á þessum 65 mínútum var gert stólpagrín að þríeykinu, áhrifum COVID á samfélagið, Bubba Morthens, Helga Björns, Þórdísi Kolbrúnu R. Gylfadóttur, skemmtanalífinu og – vitaskuld – Birni Inga hjá Viljanum, svo aðeins fáein dæmi séu nefnd.
Að venju streymdu inn líflegar athugasemdir á Twitter, fjölmörg undir myllumerkinu #skaupið, sem Íslendingar létu falla á meðan grínið var sýnt á RÚV.
Hér má sjá brot af því besta en betri tíst og verri má finna á samskiptamiðlinum Twitter.