Klárar Jarðarförina í sóttkví – „Alveg frábær tímasetning“

Um páskana verður frumsýnd glæný þáttaröð með Þórhalli (Ladda) Sigurðssyni í lykilhlutverki en þættirnir bera heitið Jarðarförin mín og má nú sjá fyrsta sýnishorn úr seríunni. Þættirnir verða sex talsins og eru framleiddir af Glassriver Productions.

Þættirnir eru byggðir á hugmynd Jóns Gunnars Geirdals, frasakóngs og athafnamanns, en þættirnir eru sagðir vera ljúfsárir; fyndnir og alvörugefnir. Koma þau Hekla Elísabet Aðalsteinsdóttir, Baldvin Z, Sóli Hólm og fleiri að handritsgerð seríunnar. Það er Kristófer Dignus sem leikstýrir.

Kristófer er hálfnaður með tveggja vikna sótt­kví og notar tímann í loka­frá­gang á Jarðar­förinni minni. Í samtali við Fréttablaðið segist leikstjórinn hafa greinst með COVID-19 eftir að hafa farið í matarboð. Nú er komið að degi sjö en undirstrikar Kristófer að vinnan hans fari auðveldlega fram að heiman.

„Það væri glatað ef maður væri að fara að frumsýna Jarðarförin mín- The Movie núna vegna þess að það er enginn að fara í bíó,“ segir leikstjórinn og bendir á hið augljósa.

„Þetta er alveg frábær tímasetning hvað það varðar að það eru bókstaflega mjög margir heima að bíða eftir skemmtilegu efni í sjónvarpi. Það er ljósið fyrir mér. Allavega að ég er að frumsýna seríu í sjónvarpi á þessum tíma sem mjög margir eru heima. Þetta er bara mitt vandamál og ég mun díla við það seinna meir og mun bara gera mína bíómynd þegar þar að kemur,“ segir hann og hlær.

Laddi fer með hlutverk manns sem greinist með ólæknandi heilaæxli sama dag og hann kemst á eftirlaun. Hann hefur eytt síðustu áratugunum í tilgangslausa rútínu, fjarlægst fjölskyldu sína og ekki lifað lífinu sem skildi.

Nú eru tvær vikur þangað til hann fer í skurðaðgerð sem mun að öllum líkindum draga hann til dauða. Hann ákveður að bæta upp fyrir tapaðan tíma með því að halda sína eigin jarðarför og vera sjálfur viðstaddur. Það er samt ekki eins einfalt og það hljómar. Fyrrverandi eiginkonan, einkasonurinn og tengdadóttirin hafa lítinn skilning á þessum áformum, hvað þá barnabarnið sem dýrkar afa sinn og getur ekki hugsað sér að missa hann. Svo flækist málið enn frekar þegar ástin kviknar á ný milli hans og fyrrverandi kærustu, en hún er einmitt presturinn sem á að jarðsyngja hann.