92% bíógesta lofa gæði nýja S-Max salarins í Smárabíó

Samkvæmt könnun sem gerð var um síðustu helgi sögðu 92% bíógesta í Smárabíó að myndgæðin í nýja S-MAX sal bíósins hefðu verið mjög góð eða framúrskarandi og 79% að háskerpugæði Flagship Laser 4K væri hvatning til að fara oftar í bíó. Þetta kemur fram í tilkynningu frá bíóinu.

Frumsýningargestir fyrir utan S-MAX salinn.            Ljósmynd: Mummi Lú.

Í tilkynningunni segir að með tilkomu salarins, sem er búinn allra nýjustu sýningartækni, Flagship Laser 4K og Dolby Atmos, sé Smárabíó orðið eitt af bestu bíóum í heimi og það eina sinnar tegundar á landinu. “S-MAX, sem stendur í raun fyrir það besta sem er í boði, býður kvikmyndahúsagestum nú upp á veislu fyrir augu og eyru með þessari nýjustu tækni sem völ er á í heiminum. Auk þess verður sýningarbúnaður í hinum sölunum uppfærður í Laser. Smárabíó verður þannig útbúið nýjustu, fullkomnustu og bestu tækni sem í boði er í heiminum og eina kvikmyndahúsið hérlendis sem notar Laser í öllum sölum en aðeins sárafá kvikmyndahús í heiminum bjóða upp á slíkt,” segir í tilkynningu frá bíóinu.

Í tilkynningunni segir að viðbrögð áhorfenda yfir nýju tækninni við sýningu á fyrstu myndinni sem sýnd var í salnum, nýju Tom Cruise myndinni The Mummy, hafi ekki leynt sér.

Betra sætispláss

„Viðbrögð gesta þessa frumsýningarhelgi voru frábær og ljóst að Laser 4K og Dolby Atmos slógu í gegn. Þetta er einfaldlega fullkomnasti bíósalur landsins en auk þess að þetta sé veisla fyrir augu og eyru, þá höfum við búið til miklu betra sætispláss svo enn betur fari um gesti,“ segir Lilja Ósk Diðriksdóttir, markaðsstjóri Smárabíós í tilkynningunni.

Jón Diðrik Jónsson eigandi Senu og Stijn Henderickx frá Barco. Ljósmynd: Mummi Lú.

„Við erum himinlifandi að Smárabíó hafi fært kvikmyndahúsaupplifun á Íslandi á næsta stig. Bíógestir í S-MAX salnum munu njóta enn meiri gæða sem skilar fullkomnari sjónrænni reynslu, þökk sé Flagship Laser tækninni frá Barco,“ segir Stijn Henderickx, aðstoðarforstjóri Barco.