Næst hjá Emmerich og Devlin

Þeir ágætu félagar Roland Emmerich og Dean Devlin eru alltaf með eitthvað frábært á döfinni. Nú ættu allir þeir sem voru hrifnir af Godzilla (já, ég er að tala við ykkur báða) og öllum hinum frábæru myndunum þeirra að gleðjast, því þeir eru með nýja mynd í gangi. Heitir hún Cyber Love Story, og fjallar um það hvernig í framtíðinni geti pör farið inn í sýndarveruleika skapaðan í tölvum til þess að finna hinn fullkomna maka. Einnig er í vinnslu hjá þeim tryllirinn Cellular sem fjallar um mann sem reynir að hafa uppi á fórnarlambi mannræningja sem hringdi óvart í farsímann hans. Ekki kemur fram hvort hann hafi verið með handfrjálsan búnað.