Kanarí valin fyndnasta íslenska kvikmyndin

Heimildarmyndin Kanarí eftir þær Magneu B. Valdimarsdóttir og Mörtu Sigríði Pétursdóttir var valin fyndnasta kvikmyndin á nýafstaðinni Gamanmyndahátíð, eða Iceland Comedy Festival, sem haldin er árlega á Flateyri. Kanarí fjallar um þá einstöku íslensku menningu sem hefur tekið sér bólfestu á Kanarí, eins og segir í tilkynningu frá hátíðinni.

Þar sem aðstandendur sigurmyndar hátíðarinnar, Kanarí voru ekki viðstaddir tóku allir gestir hátíðarinnar, sem hafa farið til Kanarí, við verðlaununum.

Í tilkynningunni segir einnig að mikið fjölmenni hafi sótt hátíðina, og gestir hafi tífaldast frá fyrstu hátíðinni fyrir fjórum árum síðan.

Gamall bræðslutankur þjónar hlutverki kvikmyndahúss á Gamanmyndahátíðinni.

Meðal helstu viðburða hátíðarinnar í ár má nefna Tónleika-bíósýningu Tónlistarskóla Ísafjarðar, þar sem nemendur léku undir Buster Keaton myndinni The Boat undir troðfullu húsi. Þá var Edda Björgvinsdóttir heiðruð fyrir framlag sitt til gamanmyndagerðar á Íslandi á undan sérstakri hátíðarsýningu á Stellu í Orlofi ásamt því sem Arctic Fish bauð upp á Laxaveislu í anda Stellu Löve. Þann 25 september verða 10 ár frá því að Algjör Sveppi og leitin að Villa var frumsýnd og var því fagnað með barnasýningu að viðstöddum Sveppa.

Edda Björgvins með heiðursverðlaunin ásamt Ársæli Níelssyni og Eyþóri Jóvinssyni, skipuleggjendum hátíðarinnar.

Haldnar voru tvær vinnusmiðjur í tengslum við hátíð ársins, Leiklistarskóli Borgarleikhússins var með námskeið í persónusköpun fyrir börn og þá var í fyrsta sinn haldin 48 stunda gamanmyndakeppni, þar sem þrjú lið voru skráð til leiks og unnu gamanmynd á 48 klukkustundum þar sem þema ársins var Fiskur. Myndin Ballarahaf eftir þá Margeir Haraldsson, Andra Fannar Sóleyjarson og Rúnar Inga Guðmundsson var kosin fyndnasta mynd 48 stunda keppninnar af áhorfendum.

Plötusnúður án vegabréfs

Fyndnasta erlenda gamanmyndin í fullri lengd var Sawah eftir leikstjóran Adolf El Assal, þar sem íslenska leikkonan Elísabet Jóhannesdóttir fer með eitt aðalhlutverkið. Myndin fjallar um Skaarab, plötusnúð frá Egyptalandi sem er boðið að spila í Brussel. Á leiðinni glatar hann vegabréfinu sínu sem verður til þess að hann er álitinn flóttamaður og þarf að beita öllum ráðum til að komast á leiðarenda.

Fyndnasta erlenda stuttmyndin, að mati áhorfenda, var Robbish Robbers eftir Anders Teig. Myndin fjallar um nokkra bankaræninga og eina flugu.

Tvíhöfði skemmti gestum hátíðarinnar.