Skóli á leið til helvítis

Bresku leikararnir Simon Pegg og Nick Frost eru vanir því að leika í skemmtilegum kvikmyndum saman, og nú hafa þeir bætt um betur og stofnað framleiðslufyrirtækið Stolen Picture. Fyrsta myndin sem nýja fyrirtækið þeirra gerir er grín-splatter-hrollvekjan Slaughterhouse Rulez, en fyrsta stiklan úr myndinni er nú komin út.

Kvikmyndin, sem inniheldur leikara eins og Michael Sheen, Asa Butterfield, Finn Cole og Hermione Corfield, gerist í heimavistarskólanum Slaughterhouse, en þangað koma börn fína og fræga fólksins, og búa sig undir að taka völdin í samfélaginu og ná almennum yfirburðum yfir samborgara sína.

En nú hafa ókunn öfl bankað á dyrnar, og ekkert verður aftur eins og áður, því risastór hola sem leiðir beint til helvítis hefur opnast á skólalóðinni!

Nú upphefst blóðug barátta nemenda og kennara fyrir lífi sínu.

Eins og sjá má í stiklunni þá svífur andi fyrri mynda þeirra Pegg og Frost yfir vötnum, en þeir eru frægir fyrir grín-hrollvekjurnar Shaun of the Dead, Hot Fuzz og World´s End.

Um leikstjórn og handrit sér Henry Fitzherbert.

Frumsýning er áætluð á hrekkjavökunni, þann 31. október nk. í Bretlandi.