Dóp og tilfinningar í fyrstu stiklu Lof mér að falla

Fyrsta stikla íslensku kvikmyndarinnar Lof mér að falla eftir Baldvin Z hefur verið birt, en myndin fjallar um hina 15 ára gömlu Magneu en líf hennar umturnast þegar hún kynnist hinni átján ára gömlu Stellu.

Myndin verður frumsýnd 7. september nk.

Magnea laðast að hispurslausu lífi Stellu og þróar Magnea sterkar tilfinningar til hennar sem Stella notfærir sér til eigin hagsbóta. Stella leiðir Magneu inn í heim fíkniefna sem hefur alvarlegar afleiðingar fyrir þær báðar. 12 árum síðar liggja leiðir þeirra óvænt saman og verður uppgjör á milli þeirra óumflýjanlegt.

Leikstjóri myndarinnar er eins og fyrr sagði Baldvin Z en hann skrifar einnig handrit myndarinnar ásamt Birgi Erni Steinarssyni. Þeir skrifuðu einnig handrit kvikmyndarinnar Vonarstrætis, sem Baldvin Z leikstýrði, sem fékk tólf verðlaun á Edduverðlaunahátíðinni árið 2015.

Með aðalhlutverk í Lof mér að falla fara leikkonurnar Elín Sif Halldórsdóttir og Eyrún Björk Jakobsdóttir en  Þorsteinn Bachman fer einnig með stórt hlutverk. Í myndinni fara einnig með hlutverk Sturla Atlason, Edda Björgvinsdóttir, Ólafur Darri Ólafsson og Halldór Halldórsson.

Sjáðu stikluna hér fyrir neðan: