Ný hágæðasæti og AXL bíósalur í endurbættu Laugarásbíói

Á síðustu fimm vikum, eða frá 11. september, hafa staðið yfir miklar framkvæmdir í Laugarásbíói og hefur það nú verið opnað aftur eftir gagngerar breytingar. Í tilkynningu frá bíóinu segir að með breytingunum skipi Laugarásbíó sér á pall með bestu kvikmyndahúsum heims. „Allir salir eru nýir og endurbættir og skarta nú hágæðasætum sem enginn verður svikinn af. Bíógestir okkar munu nú njóta bestu mögulegra gæða í sætum, hljóði og mynd,“ segir í frétt frá bíóinu.

Þar segir einnig að flaggskip kvikmyndahússins sé nýr AXL-salur, sem er einn fullkomnasti bíósalur í heimi. AXL stendur fyrir Atmos-Luxury-Laser og endurspeglar það sem salurinn býður upp á.

„Dolby Atmos er eitt þróaðasta hljóðkerfið á markaðinum í dag, en það skilar flæðandi hljómi sem hægt er að staðsetja af nákvæmni og færa til hvert sem er í þrívíðu rými. Áhorfendur njóta sýningarinnar í kraftmiklum hljómi sem gefur umlykjandi og tilfinningaþrungna upplifun. Luxury felur í sér lúxussæti í fremsta flokki og meira fótarými. Með Barco 4K Laser-myndvarpa býðst Íslendingum ein fullkomnasta sýningartækni sem fáanleg er í heiminum, en með henni fást einstök myndgæði og skerpa. Svo má til gamans má geta að á fremsta bekknum í AXL-salnum eru rafmagnshægindastólar með fótskemli sem ekki þarf að greiða aukalega fyrir.

Allt frá opnun Laugarásbíós hefur verið lagður mikill metnaður í að bjóða bíógestum upp á fullkomnustu tæknina í mynd, hljóði og öðrum búnaði sem viðkemur sýningu kvikmynda. Laugarásbíó er stolt af þessari andlitslyftingu, enda bíóið nú orðið leiðandi á Íslandi í tækni og þægindum!“