Fyrsta stiklan úr Warcraft: The Beginning er komin út. Myndin er byggð á tölvuleiknum vinsæla World of Warcraft. 
Miðað við stikluna er ljóst að mikil ævintýramynd er í vændum með alls kyns furðuverum.
Leikstjóri er Duncan Jones og með helstu hlutverk fara Travis Fimmel, Paula Patton, Ben Foster, Dominic Cooper, Toby Kebbell, Ben Schnetzer, Rob Kazinsky og Daniel Wu.
Warcraft: The Beginning er væntanleg í bíó í júní á næsta ári. Myndin gerist í fantasíuheiminum Azeroth þar sem ýmiss konar verur búa. Hún fjallar um lítið brot af Warcraft-heiminum, eða byrjunina á deilunum á milli mannfólksins og orka.
World of Warcraft er vinsælasti fjölspilunarleikur á netinu í heiminum, með yfir fimm milljónir notenda.