John C. Reilly í Wreck-it Ralph 2

John C. Reilly, sem lék aðalhlutverkið í myndinni um Rústarann Wreck it Ralph, sem frumsýnd var árið 2012, hefur tilkynnt opinberlega að von sé á framhaldi á þessari skemmtilegu teiknimynd.

Wreck-it-Ralph-1

Myndin fjallar um persónu í tölvuleik sem rústar byggingu sí og æ, en þráir ekkert heitar en vera elskaður og dáður.

Orðrómur hefur verið í gangi lengi um framhald, enda þénaði fyrri myndin 470 milljónir Bandaríkjadala í miðasölunni um heim allan, og sló í gegn.

C. Reilly staðfesti þátttöku sína í viðtali við blaðamann á Galway kvikmyndahátíðinni.

Leikstjóri fyrri myndarinnar, Rich Moore, hefur áður gefið í skyn að í næstu mynd myndi Ralph fara inn í heim internet-tölvuleikja og leikjatölvuleikja, og jafnvel hitta fyrir persónur úr Nintendo tölvuleikjum eins og Mario, Luigi, Link og Zelda.

Ekki er vitað um fleiri leikara, né hvenær von er á myndinni í bíó.