Fjöldinn allur af lykilfólki í kvikmyndagerðinni í heiminum hefur sett nafn sitt á stuðningsyfirlýsingu við íslenska kvikmyndagerð og hvetur stjórnvöld til að viðhalda núverandi fjármagni til Kvikmyndasjóðs. Bent er á að öflug íslensk kvikmyndagerð sé undirstaða og forsenda þess að hér séu teknar upp erlendar kvikmyndir.
Þetta kemur fram í tilkynningu frá Sambandi íslenskra kvikmyndaframleiðenda.
Meðal þeirra sem hafa ritað nafn sitt á áskorun til stjórnvalda og hafa unnið að sinni kvikmyndagerð hér á Íslandi eru leikstjórarnir Terrence Malick (Tree of Life), Clint Eastwood (Flags of our Fathers) og Darren Aronofsky (Noah), Steve Pazian – yfirmaður framleiðslu Warner Bros (Flags of our Fathers, Batman Begins) og Dan Wiess og Chris Newman höfundar og framleiðendur (Game of Thrones).
Í stuðningsyfirlýsingu sem þessir aðilar og margir fleiri hafa lagt nafn sitt við, segir meðal annars: „Að okkar mati eru þeir íslensku kvikmyndagerðarmenn sem við höfum unnið með fagmenn í hæsta gæðaflokki. Þeir koma ekki einvörðungu með þeirra sérþekkingu í verkefnin, heldur hafa þeir reynst ómetanlegir ráðgjafar um íslenskar aðstæður, hætti og staði og hafa þannig fært ómetanlegan ávinning til okkar verka.“.
Í tilkynningunni kemur fram að íslensk kvikmyndagerð eigi undir högg að sækja í fjárlagafrumvarpinu sem núna er í meðförum Alþingis. „Þar er lagt til að framlög til Kvikmyndasjóðs verði lækkuð um rétt tæp 40% á milli áranna 2013 og 2014, eða um 445 milljónir króna. Þessi lækkun á kvikmyndasjóði leiðir til yfir 600 m króna tekjutaps ríkissjóðs á næsta ári, yfir 200 ársverk tapast í greininni og erlendar tekjur dragist saman um yfir hálfan milljarð.“
Þess má geta að árið 2006 var gert samkomulag um íslenska kvikmyndagerð og þá var niðurstaðan að í kvikmyndasjóði þyrftu að vera 700 milljónir króna til að hann gæti uppfyllt markmið stefnumörkunarinnar. Þessi upphæð samsvarar um 1.160 milljónum í dag og hefur sjóðurinn aldrei náð því að fylla í þessa upphæð, miðað við verðlag í janúar sl.“