BÍÓ:DOX, nýr heimildamyndaklúbbur Bíó Paradísar, stendur fyrir heimildamyndahátíð dagana 9.-15. nóvember í Bíó Paradís. Þema BÍÓ:DOX hátíðarinnar er List en alls verða fimm heimildamyndir sýndar á hátíðinni sem allar eiga það sameiginlegt að gefa innsýn í líf listamanna og lista.
Myndirnar eru eftirfarandi;
MatargerðarList: Jiro Dreams of Sushi, leikstjóri David Gelb (2011). Jiro Ono er líklega besti sushi-kokkur í öllum heiminum. Jiro er 85 ára gamall en vinnur sleitulaust dag hvern frá sólarupprás til sólarlags að því að fullkomna sushigerðarlist sína. Veitingahúsið hans er hálffalið í neðanjarðarlestarstöð í Tokyo og tekur aðeins 10 manns í sæti en skartar þrátt fyrir það heilum 3 Michelin-stjörnum og fólk ferðast yfir heiminn þveran til að borða hjá Jiro. Áhorfandinn fær innsýn í ævistarf Jiros og flókið samband hans við son sinn og arftaka Yoshikazu, sem aldrei nær að blómstra í skugga föður síns.
MyndList: Wonder Women: The Untold Story of American Superheroines, leikstjóri Kirsty Guevara-Flanagan (2012). “Wonder Women – Ósögð saga bandarískra kvenofurhetja” segir frá þróun og arfleifð hinnar stórkostlegu ofurhetju Wonder Woman, allt frá tilurð teiknimyndahetjunnar um 1940 til nútíma vinsælda hennar. Í myndinni er kannað hvernig birtingarmyndir kraftmikilla kvenna endurspegla hræðslu samfélagsins við aukin réttindi þeirra. Wonder Women! kafar undir yfirborðið með Lyndu Carter, Lindsay Wagner, gamanhöfundum og listamönnum og einnig með raunverulegum kvenofurhetjum eins og Gloriu Steinem, Kathleen Hanna og fleirum, sem bjóða upp á upplýsandi og skemmtilega andstæðu við karllægan heim ofurhetja.
GjörningaList: Marina Abramovich: The artist is present, leikstjóri Matthew Akers (2012). Serbneska listakonan Marina Abramovic hefur verið kölluð „amma gjörningalistarinnar“. Myndin fylgir henni eftir þar sem hún undirbýr yfirlitssýningu á verkum sínum á MoMA nýlistasafninu í New York. Marina gerir upp líf sitt og störf, jafnframt sem hún reynir að svara spurningu sem hún hefur verið spurð aftur og aftur í meira en fjörtíu ár: Er gjörningur list?
KvikmyndaList: Woody Allen: A Documentary, leikstjóri Robert B. Weide (2012). Í þessari mynd leyfir goðsagnakennda persónan Woody Allen fólki að fylgjast með lífi sínu í fyrsta sinn í heimildamynd. Emmy-verðlaunahafinn Robert Weide fylgir meistaranum eftir í tæp tvö ár til að ná þessari einstöku ævisögu í kvikmynd. Í myndinni er fylgst með daglegu lífi Allen og samskiptum hans við leikara. Þá byggir myndin á viðtölum við leikara, fjölskyldu og vini Allen sem varpa ljósi á áhugaverða ævi snillingsins.
TónList: Seaching for Sugarman, leikstjóri Malik Bendjelloul (2012). Sixto Rodriguez var efnilegur tónlistarmaður frá Detroit sem tókst að heilla tvo plötuútgefendur upp úr skónum árið 1968. Þeir töldu sig hafa fundið nýjan Bob Dylan og gáfu út plötu hans, Cold Fact. Platan seldist hins vegar hörmulega og Rodriguez hvarf af sjónarsviðinu. Á meðan sögur gengu um versnandi geðheilsu Rodriguez, og um dramatískt sjálfsmorð, varð hann að óvæntri stórstjörnu hinum megin við Atlantshafið… í Suður-Afríku.
Sýndar á RIFF
Í tilkynningu frá Bíó Paradís kemur fram að þrjár síðastnefndu myndirnar hafi verið sýndar á RIFF, Alþjóðlegri kvikmyndahátíð í Reykjavík, en færri hafi komist að en vildu á sumar sýningarnar. Hver mynd verður sýnd nokkrum sinnum en hægt er að nálgast upplýsingar um sýningartíma og horfa á kynningarstiklur BÍÓ:DOX myndanna á vefsíðu Bíó Paradísar.