Hollywood stjörnur og kynferðisbrotamenn

Foodies - Still hi-res [186510]Alþjóðleg kvikmyndahátíð í Reykjavík kynnti í dag 40 af þeim myndum sem sýndar verða á hátíðinni sem hefst þann 24. september nk. Myndirnar eru úr keppnisflokknum heimildarmyndir, Open Seas þar sem sýndar eru myndir sem getið hafa sér gott orð á kvikmyndahátíðum og þá A Different Tomorrow, flokkur mynda sem taldar eru geta bætt heiminn. Þá verða frumsýndar á Íslandi á hátíðinni heimildarmyndir um tvær af skærustu stjörnum Hollywood frá upphafi, þær Ingrid Bergman og Marlon Brando.

Alls er stefnt að því að sýna hátt í 100 myndir í fullri lengd á hátíðinni.

Í tilkynningu frá RIFF segir að heimildarmyndaformið njóti sífellt meiri vinsælda á hátíðinni og kennir þar ýmissa grasa í efnistökum. Allt frá myndum um umhverfismál, jafnréttismál, stríðsátök, tónlist til, lúxuslífs matgæðinga, ætti eitthvað að vera við allra hæfi.

INGRID BERGMAN I PARIS

Í myndinni Jäg är Ingrid er fjallað um ævintýralega sögu Ingrid Bergman, ungrar stúlku frá Svíþjóð sem á skömmum tíma varð skærasta stjarna Hollywood. Birt eru áður óbirt myndbrot, viðtöl og dagbókarbrot Bergman í myndinni sem fékk sérstök dómnefndarverðlaun á kvikmyndahátíðinni í Cannes í vor. Rætt er við vini og vandamenn Bergman sem margir hverjir eru frægir leikarar, þ.á.m. dóttur hennar Isabellu Rosselini.

Þá verður jafnframt til sýninga myndin Listen to me Marlon. „Ef horft er yfir alla þekktustu leikara Hollywood á 20. öld þá er óhætt að fullyrða að fáar stjörnur hafi skinið jafn skært og Marlon Brando. Fáir voru jafn umdeildir en samtímis dáðir eins og maðurinn sem varð yngstur allra til að hljóta Óskarinn sem besti leikari í aðalhlutverki fyrir ‘On the Waterfront’ (1954) en sniðgekk síðar athöfnina í mótmælaskyni þegar hann átti að taka á móti síðari Óskarsverðlaunum sínum fyrir leik í ‘Guðföðurnum’ (1972). Þessi nánast sjálfsævisögulega mynd er sett saman úr gríðarlegu safni hljóðupptakna sem Brando tók sjálfur upp og notar þannig hans eigin rödd til að afhjúpa manninn á bak við goðsögnina. Myndin var frumsýnd á Sundance heimildarmyndahátíðinni í ár.“

Þá ber að nefna myndina Pervert Park. Florida Justice Transitions lítur út eins og hver annar bandarískur hjólhýsagarður. Fátt bendir til þess að allir íbúarnir séu dæmdir kynferðisafbrotamenn sem mega ekki búa nærri stöðum þar sem börn koma saman.

„Leikstjóraparið Frida og Lasse Barkfors sýnir okkur útlaga sem samfélagið fyrirlítur og telur djöfullega með því að ljá þeim andlit og rödd. Þannig neyða þau okkur til þess að taka afstöðu í siðferðislegri klemmu sem er djúpstæð og flókin. Hvort sem íbúarnir eru sjálfir fórnarlömb eður ei vaknar spurningin: Er hægt að fyrirgefa svona hræðilega glæpi eða ætti aldrei að gera það?“

Myndin hlaut sérstök dómnefndarverðlaun á Sundance-hátíðinni í ár.

Hér fyrir neðan má sjá stiklur úr tveimur athyglisverðum myndum til viðbótar sem sýndar verða á hátíðinni:

Frekari umfjöllun og stiklur um myndir má finna inn á heimasíðu RIFF, riff.is/is/dagskra.

Stikk: