Þýski leikstjórinn Roland Emmerich greindi frá titli framhaldsmyndar Independence Day þegar hann sat fyrir svörum á netinu í gær.
Myndin mun heita Independence Day: Resurgence. Hún er væntanleg í bíó í Norður-Ameríku eftir nákvæmlega eitt ár, eða 24. júní 2016.
Will Smith verður ekki á meðal leikara en Jesse Usher mun leika Dylan Dubrow-Hiller, son Captain Steve Hiller sem Smith lék í fyrri myndinni.
Á meðal annarra leikara eru Jeff Goldblum, Liam Hemsworth og Maika Monroe.
Emmerich, sem leikstýrði fyrri myndinni frá árinu 1996, hóf tökur á Independence Day: Resurgence í Nýju Mexíkó í Bandaríkjunum í síðasta mánuði.
