Ártún valin besta stuttmyndin

artunÁrtún, stuttmynd Guðmundar Arnars Guðmundssonar, var valin besta stuttmyndin á SPOT kvikmynda- og tónlistarhátíðinni og hlaut sérstök dómnefndarverðlaun á Minimalen stuttmyndahátíðinni. SPOT hátíðin fór fram í Árósum í Danmörku frá 30. apríl til 3. maí og Minimalen hátíðin fór fram í Þrándheimi í Noregi frá 22. til 26 apríl. Þetta kemur fram í fréttatilkynningu frá Kvikmyndamiðstöð Íslands.

Ártún hefur nú unnið til alls sex alþjóðlegra verðlauna síðan hún var frumsýnd á RIFF hátíðinni í október á síðasta ári. Áður hafði hún unnið til Gullna Skjaldarins á alþjóðlegu kvikmyndahátíðinni í Chicago, aðalverðlaun alþjóðlegu stuttmyndahátíðarinnar í Brest í Frakklandi, aðalverðlaun FEC hátíðarinnar í Reus á Spáni og sérstök dómnefndarverðlaun á RiverRun International Film Festival í Winston-Salem í Bandaríkjunum. Ártún hefur nú verið valin til þátttöku á yfir 25 alþjóðlegum kvikmyndahátíðum. Þá var hún tilnefnd fyrir bestu leikmynd (Linda Stefánsdóttir) á Edduverðlaunahátíðinni 2015.

Ártún fjallar um ungan strák sem langar að upplifa sinn fyrsta koss en ekkert gengur í litla þorpinu þar sem hann býr. Bestu vinir hans segja frá stelpum í borginni sem fara í vímu og eru til í allt þegar þær reykja sígarettur. Hann á erfitt með að trúa því en ákveður samt að fara með þeim til borgarinnar og sjá hvað gerist.

Guðmundur Arnar Guðmundsson leikstýrir og skrifar handritið að Ártúni en myndin er framleidd af Antoni Mána Svanssyni fyrir Join Motion Pictures í samstarfi við Sagafilm og hið danska Fourhands Film. Rúnar Rúnarsson er meðframleiðandi og kvikmyndataka er í höndum Norðmannsins Sturla Brandth Grøvlen, sem vann nýlega Silfurbjörn fyrir framúrskarandi listrænt framlag á Berlinale hátíðinni. Verðlaunin hlaut hann fyrir kvikmyndatöku sína í Victoria, kvikmynd sem er 140 mínútur að lengd og er öll tekin upp í einni töku.

Hægt er að fylgjast nánar með vegferð Ártúns um kvikmyndahátíðir heimsins á Facebook síðu myndarinnar.

Stikk: