Ný mynd um Svamp Sveinsson, The SpongeBob Movie: Sponge Out of Water, er væntanleg snemma á næsta ári, en fyrsta stiklan úr myndinni var opinberuð í dag. Tíu ár eru liðin síðan fyrsta Svamps Sveinssonar kvikmyndin kom út, en hún hét einfaldlega SpongeBob SquarePants Movie.
Svampur og hinn treggáfaði Pétur krossfiskur hafa alltaf notið mikilla vinsælda, bæði meðal barna og fullorðinna, en þættirnir voru fyrstu ódýru teiknimyndirnar frá Nickelodeon sem náðu viðlíka vinsældum.
Tom Kenny mun að sjálfsögðu ljá Svampi rödd sína. Með önnur hlutverk fer m.a. Antonio Banderas, en hann leikur sjóræningjann Alameda Jack. Í myndinni eiga Svampur Sveinsson og félagar í höggi við þennan umrædda sjóræningja sem ætlar sér að ræna mikilvægu skjali sem er geymt í heimabæ þeirra á botni sjávar.
Hér að neðan má sjá fyrstu stikluna úr myndinni.