DreamWorks Pictures hefur birt fyrstu stikluna fyrir myndina Need for Speed sem gerð er eftir samnefndum tölvuleik. Með aðalhlutverkið fer Breaking Bad leikarinn Aaron Paul.
Paul leikur götuökuþór og vélvirkja sem slæst í hóp með ríkum viðskiptafélaga, sem Dominic Cooper leikur. Þau kynni enda með því að komið er á hann sök og hann sendur í fangelsi fyrir glæp sem hann framdi ekki. Þegar hann kemur úr fangelsi þá gengur hann til liðs við neðanjarðar keppnislið, og leitar hefnda.
Sjáðu stikluna hér fyrir neðan:
Leikstjóri myndarinnar er fyrrum áhættuleikarinn Scott Waugh ( Act of Valor ). Aðrir leikarar í myndinni eru Imogen Poots, Scott Mescudi, Ramon Rodriguez, Michael Keaton, Rami Malek, Dakota Johnson og Harrison Gilbertson.
Frumsýning verður 14. mars 2014.
