Bestu myndir Evrópu í Bíó Paradís – stiklur!

Evrópska kvikmyndahátíðin (e. European Film Festival Iceland / EFFI) verður haldin í annað sinn í Bíó Paradís dagana 19.-29. september nk. en henni er ætlað að gefa þverskurð af því besta sem álfan hefur uppá að bjóða innan kvikmyndagerðar, að því er segir í tilkynningu frá Bíó Paradís. Hátíðin er haldin á vegum Evrópustofu – Upplýsingamiðstöðvar ESB á Íslandi í samstarfi við Bíó Paradís.

1_e_Felix_van_Groeningen__The_Broken_Circle_Breakdown

,,Evrópskir kvikmyndagerðamenn eru fremstir meðal jafningja og við erum stolt af því að geta boðið íslenskum áhorfendum að sjá nokkrar af nýjustu og ferskustu evrópsku myndunum undanfarin misseri hér í bíóinu. Það er einnig stórkostlegt staðreynd að loks verður kominn upp nýr stafrænn sýningarbúnaður og hljóðkerfi, svo að myndirnar verða sýndar í bestu mögulegu gæðum,” segir Hrönn Sveinsdóttir, framkvæmdastjóri Bíó Paradísar í tilkynningunni.

Boðið verður upp á 12 nýjar og nýlegar myndir frá Evrópu auk eldri mynda í leikstjórn Agniezsku Holland sem er heiðursgestur hátíðarinnar.

Hátíðin hefst fimmtudaginn 19. september og þá er öllum boðið frítt í bíó og að sýningum loknum verður efnt til fjörugra blágresistónleika í takt við tónlistina sem leikin er í opnunarmynd hátíðarinnar, hinni margverðlaunuðu Broken Circle Breakdown. Hún hefur farið hefur sigurför um Evrópu og er jafnframt tilnefnd er til áhorfendaverðlauna Evrópsku kvikmyndaverðlaunanna 2013.

Agnieszka Holland er heiðursgestur

AHolland_HBO_fot_Karolina_Poryza_a_6_b

Heiðursgestur hátíðarinnar í ár er pólska kvikmynda- og sjónvarpsleikstýran Agniezska Holland. Hún er einnig verðlaunaður handritshöfundur en einna þekktust er hún fyrir framlag sitt til pólitískrar kvikmyndagerðar í Póllandi. Hún er talin ein af fáum starfandi kvenleikstjórum í Hollywood sem hefur getið sér gott orð í listrænni og pólitískri kvikmyndagerð og var kvikmynd hennar „Í myrkrinu“(e. In Darkness) meðal annars tilnefnd til Óskarsverðlaunanna í fyrra Sérstök sýning verður sett upp í anddyri Bíó Paradísar sem fjallar um í feril Holland sem veitir gestum einstaka innsýn inn í heim kvikmyndaleikstjórnar í Evrópu á níunda og tíunda áratugnum.

Sjónlýsing fyrir blinda

Stærsti viðburður Evrópsku kvikmyndahátíðarinnar verður sýning á myndinni „Í myrkrinu“(e. In Darkness) eftir Agniezsku Holland með sérstakri sjónlýsingu fyrir blinda. Þessi dagskráliður er hluti af samvinnuverkefni Bíó Paradísar og Wroclaw-West Menningarmiðstöðvarinnar í Póllandi um að bæta aðgengi fatlaðra að menningu. Verkefnið er styrkt af Evrópusambandinu en verndari þess í Póllandi er Agniezska Holland. Verndari verkefnisins á Íslandi verður kynntur á hátíðinni.
Meðal annarra sérviðburða hátíðarinnar er sérstök móttaka fyrir börn í tilefni frumsýningar lettnesku barnamyndarinnar „Mamma ég elska þig“ (e. Mother, I Love You) og fjörug dansveisla til heiðurs Evrópskri dansmenningu í kjölfar sýningar heimildamyndarinnar „Shut Up and Play the Hits“.

Myndir hátíðarinnar eru eftirfarandi:

The Broken Circle Breakdown (Belgía / Holland 2012) 111 MÍN.
LEIKSTJÓRI: Felix Van Groeningen. AÐALHLUTVERK: Veerle Baetens, Johan Heldenbergh, Nell Cattrysse. ÍSLENSKUR TEXTI.

The Broken Circle Breakdown er nýjasta mynd leikstjórans Felix van Groeningen. Myndin er byggð á vinsælu samnefndu leikriti eftir Johan Heldenbergh og Mieke Dobbels og segir sögu Elise og Didier, tveggja mjög svo ólíkra einstaklinga sem kynnast fyrir tilviljun. Þau verða ástfangin, gifta sig og Elise verður óvænt ólétt. Þegar barn þeirra greinist með ólæknandi sjúkdóm reynir á samband þeirra. Myndin hefur farið sigurför um Evrópu og meðal annars hlotið verðlaun fyrir bestu Evrópsku myndina af Europa Cinemas Label og áhorfendaverðlaun Berlinale 2013. Myndin er tilnefnd til áhorfendaverðlauna Evrópsku kvikmyndaverðlaunanna 2013.

Fegurðin mikla (La grande bellezza) (Ítalía / Frakkland 2013) 142 MÍN
LEIKSTJÓRI: Paolo Sorrentino. AÐALHLUTVERK: Toni Servillo, Carlo Verdone, Sabrina Ferilli. ENSKUR TEXTI

Fegurðin mikla er ítölsk/frönsk mynd eftir leikstjórann Paolo Sorrentino. Myndin gerist í Róm og segir sögu rithöfundar sem á erfitt með að horfast í augu við að vera farinn að eldast og lítur með biturleika aftur á ástríðufull ár sín sem ungs manns. Kvikmyndin var meðal annars tilnefnd til Palme d’Or verðlaunanna á Cannes kvikmyndahátíðinni 2013 og hlaut verðlaun fyrir bestu kvikmyndatöku á ítölsku Golden Globe kvikmyndahátíðinni.

Kvöl (Child‘s Pose) (Rúmenía 2012) 112 MÍN
LEIKSTJÓRI: Călin Peter Netzer. AÐALHLUTVERK: Luminita Gheorghiu, Bogdan Dumitrache, Natasa Raab. ÍSLENSKUR TEXTI

Kvöl er rúmensk kvikmynd eftir leikstjórann Călin Peter Netzer. Myndin segir sögu Corneliu, stjórnsamrar móður sem sér sér leik á borði til að ná stjórn á fullorðnum syni sínum eftir að hann er ákærður fyrir manndráp. Myndin var frumsýnd á Alþjóðlegu kvikmyndahátíðinni í Berlín þar sem hún hlaut hin virtu Golden Bear verðlaun árið 2013.

Hunang (Miele) (Frakkland / Ítalía 2013) 100 MÍN
LEIKSTJÓRI: Valeria Golino. AÐALHLUTVERK: Jasmine Trinca, Carlo Cecchi, Libero De Rienzo. ENSKUR TEXTI

Irene býr ein og lifir heldur einangruðu lífi. Hún vinnur við aðhlynningu dauðvona fólks og aðstoðar það m.a. með lyfjagjöfum. Dag einn þá gefur hún sjúklinginum Grimaldi sem er nýlagstur inn of stórann lyfjaskammt til þess eins að sannreyna það að að hann sé í raun og veru langt frá því að vera veikur. Samband Irene og Grimaldi er þrungið spennu og þróast á þann veg að líf hennar verður aldrei samt. Myndin hlaut verðlaun á kvikmyndahátíðinni í Cannes árið 2013. Hún er einnig tilnefnd til Lux verðlaunanna árið 2013.

Gyllta búrið (The Gilded Cage) (Frakkland/ Portúgal 2013) 90 MÍN

LEIKSTJÓRI: Ruben Alves. AÐALHLUTVERK: Rita Blanco, Joaquim de Almeida, Roland Giraud. ENSKUR TEXTI.

Sprenghlægileg gamanmynd sem segir frá útivinnandi Portúgölsku pari, þeim Maríu og José, sem hefur verið búsett í París í tæp 30 ár. Í gegn um árin hafa þau tengst fólkinu í umhverfi sínu svo um munar og því takast þau á við möguleikann á að snúa aftur til Portúgal, þar sem þeirra verður sárt saknað. Hversu langt munu nágrannar þeirra, fjölskylda og vinnuveitendur ganga til þess að koma í veg fyrir það að þau flytji? Því að innst inni vilja þau María og José fara frá Frakklandi, og flýja hið gullna búr sem þau hafa skapað sér í París. Myndin er tilnefnd til áhorfendaverðlauna Evrópsku kvikmyndaverðlaunanna 2013.

Oh Boy (Þýskaland 2012) 85 MÍN
LEIKSTJÓRI: Jan Ole Gerster. AÐALHLUTVERK: Tom Schilling, Katharina Schüttler, Justus von Dohnányi. ÍSLENSKUR TEXTI.

Oh Boy er margverðlaunuð þýsk grínmynd frá 2012 og er frumraun leikstjórans Jan Ole Gerster. Myndin er svarthvít og segir frá sólarhringi í lífi Niko, ungs manns sem er atvinnulaus og hættur í námi, þar sem hann rekur stefnulaust um götur Berlínar og allt virðist ganga á afturfótunum. Myndin hefur hlotið fjöldan allann af verðlaunum, meðal annars German Film Award (Lola) 2013 fyrir bestu myndina, en það eru virtustu verðlaun innan þýskrar kvikmyndaiðnaðarins, auk Lola verðlauna fyrir besta handrit, besta leikara í aðalhlutverki (Tom Schilling), besta aukaleikara (Michael Gwisdek) og bestu kvikmyndatónlist. Myndin er tilnefnd til áhorfendaverðlauna Evrópsku kvikmyndaverðlaunanna 2013.

Mamma, ég elska þig (Mother, I Love You) (Lettland 2013) 82 MÍN
LEIKSTJÓRI: Janis Nords. AÐALHLUTVERK: Kristofers Konovalovs, Vita Varpina, Matiss Livcans. ÍSLENSKUR TEXTI.

Mamma, ég elska þig er raunsæ dramatísk mynd sem gefur áhorfandanum innsýn inn í tilfinningalíf viðkvæms ungs drengs, Raimond. Í myndinni er því líst á einstaklega viðkæmann hátt þeim samskiptum sem móðir og sonur þurfa að glíma við til þess að endurbyggja samband sitt. Myndin hefur unnið til fjölda verðlauna m.a. á Berlinale kvikmyndahátíðinni 2013 og á kvikmyndahátíðinni í Los Angeles 2013, sem og á kvikmyndahátíðinni í Zlin vann hún til verðlauna Evrópsku barnakvikmyndasamtakanna.

Í blóma (In Bloom) (Georgía/Frakkland/Þýskaland 2013) 102 MÍN
LEIKSTJÓRAR: Nana Ekvtimishvili, Simon Groß. AÐALHLUTVERK: Lika Babluani, Mariam Bokeria, Zurab Gogaladze. ENSKUR TEXTI.

Myndin gerist í upphafi tíunda áratugarins í Tbilisi, höfuðborg Georígu sem hafði þá nýorðið sjálfstætt ríki eftir fall Soviétríkjanna. Í landinu blasir við ofbeldi, stríð á Svartahafsströndinni (Abkhazia) og í myndinni er því vanréttlæti sem hrjáði samfélagið lýst. Fyrir Eku og Natiu, fjórtán ára samrýmdar vinkonur, þá opinberast lífið á einhvern hátt á öllum sviðum tilverunnar, bæði úti á götu, í skólanum og með vinum og eldri systur. Þó svo að þær séu að upplifa samfélag þar sem karlkynið ræður ríkjum, þar sem ungur giftingaraldur og blekkingar í ástarmálum eru daglegt brauð, þá er lífið í blóma og heldur áfram sinn vanagang. Myndin vann til verðlauna CICAE á Berlinale, kvikmyndahátíðinni í Berlín árið 2013 og FIRPRESCI verðlaunin á Alþjóðlegri kvikmyndahátíð í Hong Kong ásamt fjölda annarra verðlauna.

Shut up and Play the Hits (Heimildamynd/ Bretland 2012) 108 MÍN
LEIKSTJÓRAR: Will Lovelace, Dylan Southern. AÐALPERSÓNUR: James Murphy, Chuck Klosterman, Keith Anderson. ENSKUR TEXTI.

Shut Up and Play the Hits er heimildamynd frá 2012 eftir Dylan Southern og Will Lovelace. Myndin fylgir framlínumanni hljómsveitarinnar LCD Soundsystem, James Murphy, á 48 tíma tímabili, frá deginum sem hljómsveitin hélt sína síðustu tónleika í Madison Square Garden og þar til morguninn eftir tónleikana. Í myndinni eru einnig sýnd brot úr viðtali sem poppmenningar blaðamaðurinn Chuck Klosterman tók við Murphy. Myndin vann verðlaun fyrir „bestu efnistök á lifandi tónlist“ á Bresku myndbandatónlistarverðlaununum árið 2012.

Evrópa Evrópa (Europa Europa )(Þýskaland / Frakkland /Pólland 1990) 112 MÍN
Myndin er byggð á sjálfsævisögu Solomon Perel, þýskættuðum gyðingi sem flúði útrýmingabúðir nasista, með því að sigla undir fölsku flaggi og þykjast vera arískur þjóðverji. Myndin heitir á frummálinu Hitlerjunge Salomon. Myndin vann Golden Globe verðlaunin sem besta erlenda kvikmyndin árið 1991 og var tilnefnd til Óskarsverðlaunanna sama ár fyrir besta handritið, en tapaði fyrir myndina Lömbin þagna (The Silence of the Lambs).

ti105828_large

Í myrkri (In Darkness) (Pólland 2011) 145 MÍN
LEIKSTJÓRI: Agnieszka Holland. AÐALHLUTVERK: Robert Wieckiewicz, Benno Fürmann, Agnieszka Grochowska. – með sjónlýsingu.  Agnieszka Holland – spurt og svarað.

Í myrkri í leikstjórn Agnieszka Holland er byggð á sannsögulegum atburðum. Myndin fjallar um Leopold Socha, sem vinnur í holræsum og er þjófur í borginni Lvov í Póllandi, sem er hernuminn af nasistum. Einn daginn verður hópur gyðinga á vegi hans, sem reyna að flýja ástandið, en þá hjálpar hann þeim, gegn greiðslu, með því að fela það í undirheimum holræsanna undir borginni þar sem ófriður geysaði. Myndin verður sýnd með sjónlýsingu ásamt því að leikstjórinn mun bjóða upp á spurningar úr sal eftir sýningu myndarinnar. Myndin var tilnefnd til Óskarsverðlauna í flokknum Besta erlenda myndin árið 2012.

Brennandi runni (Burning Bush 2013)
LEIKSTJÓRI: Agnieszka Holland. AÐALHLUTVERK: Tatiana Pauhofová, Jaroslava Pokorná, Petr Stach.

Brennandi runni er þriggja þátta sería sem gerð var fyrir sjónvarpstöðina HBO eftir hina stórmerku leikstýru Agnieszku Holland. Serían er byggð á sannsögulegum atburðum og persónum, og beinir sjónum sínum að persónulegum fórnum nemans Jan Palach sem nemur sagnfræði í Prag. Jan Palach kveikti í sér í mótmælum gegn hersetu Sovíeska hersins í Tékkóslóvaíku árið 1969. Ungi lögfræðingurinn Dagmar Buresová tók að sér að verja fjölskyldu Jans í réttarhöldum gegn kommúnískri ríkistjórn, sem reyndi að svipta hann heiðrinum fyrir þessa fórn sem hann færði með hetjulegum drengsskap og sem lið í frelsun Tékkóslóvakíu.