Straight Outta Compton leikarinn Corey Antonio Hawkins, sem fór í myndinni með hlutverk Dr. Dre, mun taka við byssuhulstrinu úr hendi Kiefer Sutherland í nýrri endurræsingu á sjónvarpsþáttaröðinni 24, 24: Legacy, sem Fox sjónvarpsstöðin er með í undirbúningi.
Eins og við sögðum frá á dögunum þá verður Sutherland, og þar með aðalpersónan Jack Bauer, fjarri góðu gamni í nýju þáttunum, sem og aðrir helstu leikarar gömlu þáttanna.
Variety segir nú frá því að framleiðendur hafi leitað að þeldökkum leikara, eða leikara af spænskumælandi uppruna, í hlutverkið og væru nú búnir að ráða Hawkins, en persónan sem hann mun leika heitir Eric Carter.
Persónunni er lýst sem kláru hörkutóli, sem kemur frá erfiðum bakgrunni, áður en hann breytir lífi sínu til hins betra og gengur til liðs við the Army Rangers.
Þegar þáttaröðin byrjar er Eric heima hjá sér í Virginíufylki ásamt eiginkonunni Nicole, sem enn er ekki búið að ráða í hlutverk fyrir, þegar hann er fenginn til starfa, um leið og vandamál úr fortíðinni banka á dyrnar.
Fyrst verður gerður prufuþáttur ( Pilot ) en ef hann heppnast vel er von á fullri 13 þátta sjónvarpsþáttaröð.