Það er ekki hollt fyrir neinn leikstjóra að gera eina mynd á hverju ári, og Woody Allen hefur enn og aftur undirstrikað þá staðreynd. Stundum getur hann verið góður, einstaka sinnum frábær, en langoftast situr hann fastur í miðjumoðinu.

Ég hef sjaldan vitað til þess að "voice over" notkun geti eyðilagt kvikmynd, en hún er hættulega nálægt því í þessu tilfelli. Woody kýs að láta asnalegan þul (Christopher Evan Welch - sem hefur heldur ekki bestu rödd í heimi fyrir þannig lagað) tala með myndinni og segja okkur allt það sem persónurnar hugsa og gera. Með þessu er Woody að svindla svolítið og taka "styttri leiðina," þ.e.a.s. að láta þulinn fylla upp í allar þær upplýsingar sem einföld samtöl hefðu rétt eins getað gert, Þulurinn er hvort eð er, oftar en ekki, bara að segja hið augljósa. Þetta er eins og að horfa á myndina með commentary-hljóðrás í gangi, nema bara mjög leiðinlegri.

Þulurinn er samt ekkert að spilla fyrir neinni klassík hérna. Vicky Cristina Barcelona er ekkert sérstök mynd. Hún reynir að vera blanda af gamanmynd og léttu drama, en feilar á hvoru tveggja. Myndin er ekkert fyndin og alvarlegu augnablikin eru nánast alltaf þurr.
Persónurnar eru allar einkennilega óminnisstæðar og flestar bara leiðinlegar týpur. Mér finnst reyndar alltaf pínu fyndið hvernig Woody skrifar kvenfólk í myndum. Eins hátt álit og ég hef á manninum, þá sérstaklega fyrir gamla tímann sinn, þá verður að segjast að færni hans til að sökkva sér ofan í kvenpersónur er áberandi takmörkuð. Meðalkona í Woody Allen-mynd er einhæf, stöðluð og kvartar mjög mikið. Ég held að ég hafi ekki orðið vitni að sterkri kvenpersónu í Allen-mynd síðan Annie Hall, og jafnvel sú persóna var kynkaldur sérvitringur sem reykti mikið af grasi. Spes, finnst ykkur ekki?

En svo ég fókusi aftur á Vicky Cristina Barcelona, þá fannst mér leikurinn ágætur. Scarlett Johansson er fín leikkona en hún vinnur ekki úr miklu hérna. Sama má segja um Penelope Cruz. Eina persónan sem hafði vott af einhverri dýpt var Vicky, sem Rebecca Hall lék.
Javier Bardem kom líka frekar vel út og stal mestallri myndinni, enda gæti hann ekki staðið sig illa þótt hann reyndi.

Ég skil engan veginn að þessi mynd skuli hafa hreppt Golden Globe-verðlaunin fyrir bestu gamanmyndina. Ég sá akkúrat ekkert heillandi við hana, fyrir utan fáeina leikara, fallegt landslag og eftirminnilegan koss á milli Johansson og Cruz.
Ég vænti þess að Woody muni reyna áfram að toppa hina frábæru Match Point, en að mínu mati hefur hann farið sígandi núna. Vicky Cristina Barcelona hefur greinilega heillað einhverja, ef marka skal erlendu dómana, en persónulega myndi ég frekar kjósa að horfa aftur á Scoop eða jafnvel Hollywood Ending, og þá er nokkuð mikið sagt.

5/10