Á þessu stigi get ég ekki annað en vorkennt þeim Tim Burton og Joel Schumacher, því eftir að Christopher Nolan steig fram með sína eigin útgáfu af Leðurblökumanninum þurrkaði hann hér um bil fyrri myndirnar út af korti kvikmyndasögunnar algjörlega með því að kaffæra þeim duglega ofan í jörðina og traðka ofan á þær ekki bara einu sinni, heldur tvisvar!

Sama hvað mönnum finnst um Batman Begins, þá setti sú mynd óneitanlega nýjan standard fyrir myndasögukvikmyndir. Það var heldur ekki markmið slíkra mynda (í flestum tilfellum) að leggja áherslur sínar á persónusköpun, handrit og mannlegu þættina almennt. Ég var mjög hrifinn af fyrri myndinni. En ef skal segjast eins og er, þá var hún aðeins forrétturinn... The Dark Knight er tvímælalaust aðalmáltíðin! og líklegast eftirrétturinn líka...
Sjaldan hef ég gengið út úr bíósal (og þá af sumarmynd!) stútfullur af eins mikilli hrifningu. Það orð sem að sveif í kringum hausinn á mér til að lýsa myndinni var einfaldlega "Vá!"
Annaðhvort það eða einfaldlega... Ekki neitt! Myndin skildi mig eftir hreint út sagt orðlausan en þetta litla orð var samt samansafn af svo mörgum stórum þáttum sem að smelltu svo massívt vel saman í þessa heild sem að myndin er. Það eru stór orð, en ég hika ekki við að segja að þetta sé best heppnaða og kjarkmesta mainstream-mynd sem ég hef séð síðan fyrsta Matrix-myndin kom út. Það er eins og Nolan hafi horft á Batman Begins og stúderað hvað það var sem hann gerði vitlaust. Hlutir sem drógu þá mynd niður (svosem fáeinir handritsgallar og hraðar klippingar) eru algjörlega fjarverandi hérna, svo ég tali nú ekki um það að handritið er eflaust eitt albesta sem hefur tilheyrt þessum geira frá upphafi.

Þegar ég horfði á The Dark Knight leið mér aldrei eins og ég væri að horfa á myndasögukvikmynd. Nolan tók það fram að hann ætlaði að gera myndina meira í stíl við hráar glæpamyndir eins og Heat, sem auðvitað hljómaði forvitnilega, en núna skil ég hvað hann var að reyna að gera, og manninum tókst það greinilega með glæsibrag, sem undirstrikar það enn og aftur af hverju hann er einn uppáhalds leikstjórinn minn. Allar myndirnar hans hingað til hafa annaðhvort verið góðar eða frábærar! Eftir svona fáar myndir er varla hægt annað en að setja manninn í guðatölu í Hollywood. Ég geng samt ekki alveg svo langt með að segja að þessi slái Memento út, enda ein allra uppáhaldsmyndin mín, en hún trónir beint fyrir neðan hana og munar einungis um hársbreidd.

En ég ætla að hætta að segja stóra hluti um "vá-ið" og henda mér loks út í nákvæmlega "hvað" gerði myndina svona góða. Í fyrsta lagi er hún sterk. Ekki bara tilfinningalega traust heldur gríðarlega öflug frá öllum köntum. Nánast hvert einasta element helst saman fullkomlega; Handritið, frásögnin, persónurnar, deilurnar, hasarinn og auðvitað frammistöðurnar.

Myndin - sem og sú fyrri - er pjúra hlaðborð af hæfileikaríku fólki. Það er óþarfi að telja upp hvern og einn þar sem að allir eru mjög góðir, ef ekki frábærir. Ég geri þó undantekningu fyrir Heath Ledger heitinn, aðallega þar sem að orðið senuþjófur hefur einhvern veginn sjaldan hljómað jafn vægt í mínum eyrum, því maðurinn er svo miklu, miklu meira en það. Það hljómar alltaf eins og tilgangslaust hæp þegar fólk talar um hve frábær Ledger er í myndinni, einungis vegna þess að hann er látinn, en án djóks (no pun intended)... Maðurinn kemst m.a. á sama stall og kvikindi eins og Alex DeLarge, Hannibal Lecter og nú nýlega Daniel Plainview úr There Will Be Blood, bæði í frammistöðu og minnisstæðri persónuhegðun. Hann sýnir svo margar mismunandi hliðar á... tjah... geðveiki! Auk þess er hann virkilega fyndinn, ávallt sturlaður með skemmtileg tilþrif en umfram allt er hann íkonískur og geislar af honum út alla myndina. Ég mana einhvern til að nefna uppáhalds atriði sitt úr þessari mynd og segja að hann hafi ekki átt einhvern þátt í því. Besta atriðið að mínu mati er klárlega yfirheyrslan í fangelsinu (þótt senan með blýantinum standi líka uppúr). Ekki bara vel leikin sena, heldur frábærlega strúktúruð og "intense."

Eins og áður tók fram þá stendur handritið fullkomlega fyrir sínu. Myndin þjáist aldrei af dauðri eða tilgangslausri senu. Plottið er margbrotið og er sífellt í þróun út alla lengdina. Það er spennandi, ófyrirsjáanlegt og það er algjörlega á kafi í svo mörgum skemmtilegum pælingum sem að vekja upp mikilvægar spurningar varðandi réttlæti, sem og siðferði. Hasarinn er sömuleiðis glæsilegur og er ávallt staðsettur sem partur af sögunni. Aldrei þvingaðar sprengjur eða tilgangslausar bardagasenur. Allt smellur saman eins og það á að gera. Myndin flæðir líka alltaf á góðum hraða og þolir lengd sína undarlega vel. Kvikmyndataka og tónlist á líka skilið lof, enda tvennt sem að spilar stóran þátt í því hversu "öðruvísi" myndin er, þ.e.a.s. ef litið er á hana sem myndasögubíómynd. Það er þó áberandi að myndin höfði eflaust betur til eldri hópa heldur en 10-15 ára Batman-fíkla, því myndin er ekki bara rosalega alvarleg, heldur svo hrikalega plot-heavy (skilja þetta allir?) að krakkar eiga jafnvel til að missa þolinmæðina eða detta gjörsamlega útúr atburðarásinni.

Christopher Nolan hefur hér með trompað allar aðrar myndasögu- og ofurhetjubíómyndir (þótt Batman sé ekki beint ofurhetja... Æ, skítt með það!) sem gerðar hafa verið frá upphafi (já - aftur - án djóks!) með því að hafa sitt eintak bæði þýðingarmikið en - þegar öllu er á botninn hvolft - grípandi! Tveir þættir sem ég væri til í að sjá oftar í slíkri bíómynd.
The Dark Knight beygir helstu reglur sumarmynda og fer hún svo sannarlega langt fram úr því að vera besta mynd sumarsins. Þetta er svo sannarlega besta mynd ársins hingað til (gangi öðrum ræmum vel að toppa hana...) og eitthvað það besta sem ég hef séð í glæpamyndageiranum síðan annaðhvort Heat eða L.A. Confidential. Þessi mynd hefur hreinlega rústað og léttilega sigrað allt sem að kemst að henni. Hvort sem þú ert að tala um myndasögugeirann, opnunartölur í miðasölu eða bara þennan standard sem hún hefur sett. Þessi mynd mun skora á allar næstkomandi ofurhetjumyndir til að reyna að sleikja tærnar á sér. Bókað!

Augljóst kannski en ég segi 10/10

 Vá er það sem ég hugsaði þegar að ég fór af þessari mynd...

Þetta er MEISTARAVERK! Þegar ég horfði á Batman myndirnar fyrst þá fannst mér Batman Returns flottust því að hún var jú svo myrk og flott og töff.... Enn þegar Joel Schumacher kom með geirvörtubúningana sína og asnaskap þá varð ég fucking pist off! Þá hélt ég að ekki væri hægt að bjarga Batman seríunni... svo kom Batman Begins þá hugsaði ég með mér okey þetta er svosem fín mynd enn ég var ekki ánægður þrátt fyrir það. Svo kemur þetta Meistaraverk! Þessi mynd stóðst allar mínar væntingar hún hefur allt sem flott mynd þarf... húmor,brjálaðaspennu,töffaraskap og náttúrulega Batman og ég ætla að byrja að tala um leikarana sem stóðu upp úr hjá mér. Það var Aaron Eckhart sem að lék Two-Face/Harvey Dent og hann lék Harvey dent mjög vel og var bara góði gæjinn enn svo varð svo mikil umbreyting á honum að ég hugsaði bara með mér Holy shit! Hann varð alveg kolruglaður þegar að hann breyttist og það fannst mér mjög vel gert hjá honum. Svo var það stjarna myndarinnar Heath Ledger hann var svo mikl meira enn Stand-out hann var eiginlega sá sem hélt myndinni uppi með brjálæði,spennu,rugluðum húmor og núna halda öruglega margir sem að eru að lesa þetta að ég sé að segja þetta því að hann er dauður enn nei, HANN NELGDI ÞETTA HLUTVERK! Ef hann væri ekki dauður þá fengi hann hlutverkin í hendurnar eftir þetta. Enn já þessi mynd er MUST fyrir ja..... ALLA! Þessi mynd á eftir að lifa lengi enda er hún algjört MASTERPIECE og ekki vera að hugsa að hún sé of löng.. so What! Hún er aldrei leiðinleg. Frábær mynd sem að er svo miklu meira enn ofurhetju mynd!

The Dark Knight er fyrsta Batman myndin sem er ekki með Batman í titlinum. Mér finnst það undirstrika að þetta er alvöru mynd en ekki bara ofurhetju mynd. Það að það voru háværar kröfur um að myndin fengi tilnefningu til bestu myndar á síðustu skaraverðlaunahátíð segir sína sögu. Það hafa allir séð þessa mynd og það vita allir allt um Jókerinn og Ledger og hvernig hann einangraði sig á hótelherbergi í 6 vikur í andlegum undirbúningi. Hann fékk óskarinn (og BAFTA, Golden Globe og fl.) eins og búist var við en allt dramað í kringum dauða hans bætir einhverju óskilgreindu við þessa mynd. Það má ekki gleyma Aaron Eckhart. Hann er frábær sem Two-Face, allt hans gervi var tölvugert enda varla annað hægt. Ef ég væri Nolan myndi ég ekki gera aðra Batman mynd, best að hætta á toppnum. En sem áðdáandi vona ég innilega að hann geri þriðju myndina með Bale.

Ég horfði á aukaefnið með þessari mynd, mæli með því. Það er alveg magnað hvað þessir menn lögðu á sig til að búa til rosalegustu atriðin í þessari mynd. Maður gerir stundum ráð fyrir að ákveðnir hlutir séu tölvugerðir í dag en þeir t.d. flippuðu 18 hljóla vörubíl á venjulegri götu í Chicago í alvöru. Atriðið þegar þeir sprengdu spítalann var líka gert í alvöru með Heath Ledger gangandi út úr húsinu rétt áður. Mikið af flottustu atriðunum voru tekin upp með IMAX myndavélum sem eru með 70 mm filmu en ekki þessa venjulegu 35 mm. Með þessari tækni næst aukin dýpt og nákvæmni en vélarnar eru margfalt þyngri og erfiðari en venjulegar vélar. Batman mótorhjólið var annað sem var lögð mikil vinna í að gera raunverulegt. Hjólið er óhefðbundið og mér skilst að það sé bara einn gaur sem getur keyrt það. Batman búningurinn var tekinn aftur í gegn og í þessari mynd var í fyrsta skiptið sem hann gat snúið hálsinum.

Batman serían er áhugaverð að því leiti að í henni er ein af bestu myndum allra tíma og ein af þeim verstu. Serían skiptist meira eftir leikstjórum heldur en leikurum en þeir sem standa upp úr sem sigurvegarar eru leikstjórarnir Tim Burton og Chris Nolan. Bestu leikararnir (í aðalhlutverkum) eru Michael Keaton, Michelle Pheiffer, Christian Bale, Heath Ledger og Aaron Eckhart. Er ekki pínu áhugavert að engin myndanna ber bókstaf 2,3 etc?

 Thessi mynd f**king rokkar! Hun er besta hasarmynd, hetjumynd, mynd ever! Heath Ledger stelur senunni i hvert sinn og synd ad hann hafi ekki verid oftar  i myndinni. Eg vona ad 3.myndin kemur en natturlega an ledger sem er lika synd en vina ad hann faer oskarinn. myndin er med frabaert handrit, gedveika leikara, fyrir utan maggie gyllenhaal sem er mjog pirrandi. Aaron Eckhart hefdi att ad vera lengri sem Two-Face thvi mer fannst atridin med Two-Face mjog hradkeyrd og stutt og fà. En myndin er eins og glaepamynd eisn og Heat is stadinn fyrir ad lita ut eins og hetjumynd.
Hun fae 10/10, engin spurning!

Eftir að hafa horft á hana tvisvar, einu sinni í gær og svo aftur í kvöld, þá get ég sagt að hún verður betri með hverju skiptinu sem maður horfir á hana. Það var sumt sem ég skildi betur en á sama tíma fannst mér findið hvað sumt fór framhjá mér í seinna skiptið, líklega því ég var svo upptekinn að átta mig á heildarsöguþræðinum. Þetta er mynd sem vinnur á svo mörgum stigum að manni svimar við tilhugsunina. Ég held að þessi mynd muni eldast betur en allar hinar Batman myndirnar. Þetta er ekki sú tegund myndar sem ég elska, þær byggjast upp a öðrum hlutum en The Dark Knight. Þrátt fyrir það fer þessi mynd á lista yfir 10 best gerðu myndir allra tíma. Fullt hús.

Mér finnst þessi mynd vera hrein og klár 10, klárlega besta mynd sem er komin í ár og líka besta mynd sem komið hefur út á seinustu árum! allt fullkomið við hana, handrit, leikur, sviðsettning, bara allt! Heath Ledger er ótrúlegur!! hef aldrei séð annað eins, jack nicholson eins og rækja í samanburði við heath í þessu hlutverki! allar hreyfingar, öll hljóð, bara allt! Christian Bale fer einnig á kostum í þessari mynd og nær að túlka þessa persónu frábærlega! Aaron Eckhart er einnig mjög góður en mér finnst 2face ekki komast í hálfkvist við hinar persónurnar í þessari mynd. Gary Oldman er alltaf góður og hefur verið í miklu uppáhaldi hjá mér síðan ég sá leon. söguþráðurinn er frábær allt plot er magnað en það sem stendur uppúr að mínu mati er leikur Heath Ledger, klárlega 10 fyrir þessa mynd! mæli með að allir ungir sem aldnir, háir sem lágir, feitir sem mjóir! sjái sér færst að fara á þessa mynd!

Ég hlakkaði mikið til að sjá The Dark Knight og eftir að hafa farið á forsýninguna þá gleður mig að segja að hún hafi valdið alls engum vonbrigðum. Reyndar er hún talsvert betri heldur en Batman Begins sem þó er fín mynd. The Dark Knight heldur áfram þar sem frá var horfið og nú þarf Batman(Christian Bale) að kljást við Joker-inn(Heath Ledger) sem ætlar sér að ná völdum í Gotham Borg. Á sama tíma vingast Batman sem Bruce Wayne við saksóknarann Harvey Dent(Aaron Eckhart) í gegnum Rachael(Maggie Gyllenhaal). Dent er aðal baráttumaðurinn í stríðinu við glæpi og því vill Joker-inn koma honum undir græna torfu en ekki fer þetta betur en svo að Dent fær sýru yfir hálft andlitið og verður þá skúrkurinn Two Face. Það hreint og beint gengur allt upp í The Dark Knight. Hún er myrk, stílísk, spennandi, stórbrotin myndataka og það að það skuli allt vera á barmi örvæntingu alla myndina gefur henni stemningu sem ekki er annað hægt en að hrífast af. Svo er leikurinn vægast sagt magnaður. Christian Bale er lang lang besti Batman og leikur karakterinn eins og ég vil sjá hann. Maggie Gyllenhaal bara nokkuð sjarmerandi og Aaron Eckahart gerir virkilega creepy Two Face. Gary Oldman í einni af sínum betri frammistöðum sem hinn verðandi Gordon Lögreglustjóri. En Heath Ledger er klárlega senuþjófurinn hér sem Joker-inn. Leiksigur enda lagði hann mikið á sig fyrir hlutverkið. Allir taktarnir og smáatriðin sem hann sýnir(eins og t.d. smjattið....dásamlegt) gera þetta að óaðfinnanlegri frammistöðu. The Dark Knight er myndasögumynd sem einnig er ofbeldisfullt glæpadrama en alltaf tekst henni að halda í myndasögustílinn sem er að sjálfsögðu frábært. Meistaraverk sem fær fullt hús, fjórar stjörnur eða 10/10 í einkunn. Fullkomin mynd. FULLKOMIN!!!!!!!

 Ég hef beðið eftir þessari mynd í langan tíma. Þessi mynd uppfyllti allar mínar væntingar, og það meira. Ég ætla mér ekki að hafa þetta langt(læt aðra um það), en get sagt þetta: Leikstjórn Nolans er frábær, actionið er magnað og heldur myndin manni alveg við efnið frá byrjun til enda, útlitið er stórkostlegt og verulega drungalegt, handritið er verulega vel skrifa og sagan er virkilega góð. Einnig eru leikararnir allir fantagóðir í sínum hlutverkum, en steluþjófurinn er auðvitað Heath Ledger. Frammistaða hans sem Jokerinn er alveg hreint út sagt mögnuð, og ætti hann allavega eiga skilið Óskarstilnefningu. Hefur Ledger hefur skapað einn flottasta Villain kvikmyndasögunnar, og lætur aðra villaina líta illa út. Þetta er mynd sem allir verða að sjá, og er algjört meistaraverk. Allavega ein af 10 bestu myndum sem undirritaður hefur séð. Fær 10 af 10 hjá mér í einkunn, og einkunn sem hún á vel skilið.

 Batman Begins bjó til nýjan staðal fyrir ofurhetjumyndir og var talin af mörgum sem langbesta Batman myndin hingað til. Það er ekki rétt að kalla The Dark Knight rökrétt framhald af henni, því hún virkar vel sem einstök mynd og er svo langtum betri en Batman Begins, hvað þá upprunalegu Batman myndirnar sem höfðu um borð fleygar setningar eins og ,,Ice to see you". Christopher Nolan hefur byggt heim sem að er myrkur, þunglyndur og áhugaverðari áhorfs en sést hefur á hvíta tjaldinu.

Handrit myndarinnar er fyrsta skref The Dark Knight að fullkomnun, ekki einni sekúndu er eytt í tilgangsleysi og allar samræður og atvik í myndinni bera í sér áætlun leikstjórans. Christian Bale hefur byggt upp magnaðan feril á síðustu árum og hefur, mér að óvörum, náð að troða sér í topplista minn yfir uppáhalds leikara, og kemur sér enn ofar upp þennan lista með hreint út sagt magnaðri frammistöðu sem Batman. Bale virkar hlédrægur í þessari mynd, eins og Batman er í raun og veru að mínu mati. Það sérstaka við Batman myndirnar er að þær snúast frekar um illmennin og Gotham borg en Leðurblökumanninn sjálfan. Fremst í flokki yfir helstu leiklistarafrek síðustu áratuga er frammistaða Heath Ledger; túlkun hans á Jókernum og innlimunin í hlutverki er eitthvað það truflaðasta sem við munum sjá og nær hún að velta Hannibal Lecter úr stalli á hvaða degi sem er, sjaldan hef ég verið jafndáleiddur yfir frammistöðu manns í kvikmynd. Brennidepillinn hefur verið á Ledger síðan hann lést og hefur það valdið því að Aaron Eckhaart fær ekki nógu mikið hrós fyrir sitt hlutverk, en hann stóð sig með eindæmum vel.

Myndin er svo ótrúlega þung og hasarpökkuð að maður er tilfinningalega búin á því eftir áhorfið, og í raun tekur það þónokkurn tíma að átta sig á því hvað maður var að eyða síðustu 2 klst. og 32 mínútum í. Aldrei hvarflar það að manni að um hreintæktaða ofurhetjumynd er um að ræða, svo mikill er alvarleikinn og myrkrið í sögusviði myndarinnar. Christopher Nolan hefur hér búið til einstaka mynd sem sogar áhorfandann inní hraðskreiðan söguþráðinn þar sem hver myndataka, hver klipping og hver hljóðbylgja skilar sér á fullkominn hátt.

The Dark Knight er besta mynd sumarsins, besta mynd ársins hingað til og besta ofurhetjumynd allra tíma. Tíminn verður að leiða í ljós hvort hún komist á stall bestu mynda frá upphafi kvikmyndasögunnar. Myndin er einstækt sjónrænt listaverk sem nýtur sín til hins ýtrasta í sem stærstum bíósal, og er ein af þeim sem verður ekki fullmetin fyrr en eftir mörg hundruð áhorf, hún verður aðeins betri. Ég geng ekki svo langt með að kalla hana hina fullkomnu mynd því það er hún ekki, en einstakt kvikmyndaverk er hún þó sem mun lifa fjölmargar kynslóðir.

10/10 - 4 stjörnur af 4